Con us?

ELI Soriano man na may dating daan
Tiklop sa Abalos—“may dalawang daan…”
Kaibang anito ang sa Malakanyang
Kaya may Dureza na nagdadasalsal!

ATM ang budhi nilang naroroon
At ecu tatacut kahit isang milyon
Ang ipaparada ng El Shaddai ngayon--
Hinokus-pokus ng “Hello Garci” noon…

Kahit magtungayaw ang mga cardinal
Back off lang sila sa bulyaw Jose Pidal
Incumbent Pestedent na hindi man halal
Kakapit-bayawak nang hindi matanggal.

Kaya ang diskarte nitong mga kampon
Ang impeach Gloria bid kagyat itinapon
Dapat daw baguhin ay ang Konstitusyon
Upang ating bayan medyo makabangon…

Dati nang pakulo muling pinausok
Paningin ng madla ay tinusok-tusok
Brocha-cha lang muna saka isusuksok
Sa p’westo ang punong balakyot na pa-cute.

Dapat lang ibuka tambok ng bukana
Upang makahimod sibasib-brocha-cha
Tiyak na titirik pati mga mata
Kapag titihaya lang sa pagnanasa…

Talipandak yata’y sobrang apurado
Mapako sa p’westo’y nais masiguro
Kangkang o Con-Con man, ipinaareglo
Sa mga galamay niya sa Kongreso…

Con-Con man o kangkang, lalo daw masarap
Nang Saligang Batas ganap na malaspag
Mabobong Pulungan agad nang maglunsad
Sila-sila na lang bumuo ng “Con us!”

Sa trono ng poder masarap lumuklok
Hanggang pati tumbong maagnas, mabulok
Ito ang aralin na dapat matalos
Sobra-sobrang power kasunod… pagsabog!

Luklukan ng poder: silya elektrika!
Boltaheng dadaloy ibig dagdagan pa
Elektrisidad man kapag sobra-sobra
Nakaupong reyna’y tiyak matutusta…