Hampas-lampas kay de la Paz

Mahirap nga namang mabimbang ni Misis
Kaya inako na ng kawawang pulis—
Si de la Paz lang ang tanging eurologist
Na sablay ang tangka sa perang naipit.

Kahit na si Misis ang siyang natutop
Maginoong Mister magkukusang-loob
Aako sa sala kahit pa mabulok
Sa pagkakapiit o pitpit ng beklog…

Kung sisipatin po bilang na six point nine—
Milyon o posisyon na katakam-takam
Umaatikabo talagang kainan,
Inungkat pa natin at ibinuyangyang!

On my own better half, ganoon nga yata
Ang naging pag-amin na kanyang ginawa
O “on my own behalf” na ngang nagparaya
Upang ipagtanggol ang esposang mutya…

Ang euronary track inspection talaga
Napakabusisi at nakakapika!
Pati nakatagong katiting na pera
Tila mga hita—pilit ibubuka.

One hundred five thousand euros na nakalkal
Sana ay ginawang traveller’s checks na lang
Kahit saang customs man iyon mabungkal
Wala nang hinalang may tangkang illegal…

Misis ang natutop, Mister ang umamin
Hanggang sa Senado—Mister ang nadiin…
Misis ang nagpuslit, inako ni Mister
Mister ang sumabit, lusot si Kumander…

Tayong mga mister—kahit pa heneral—
Haharap saanmang igting ng labanan
Kahit Senate hearing pa ang pagtapunan
Susunod sa atas ng esposang mahal…

Kung tayo’y dadayo saan pa mang nasyon
Upang makatuklas: Clitourist attraction!
Esposa’y iwanan, tayo’y maglimayon
Ligtas pa tayo sa euro tract infection.

Nawa’y naging aral sa mga mahilig
Posisyong six point nine na kaibig-ibig
Magbitbit-gumamit niyong traveller’s chicks…
Este, nagkamali… dapat traveller’s checks!